पूर्वसचिव अर्जुनकुमार कार्की
काठमाडौँ — नेपाल ट्रस्टको दरबारमार्गस्थित जग्गा लिज प्रकरणमा पूर्वसचिव अर्जुनकुमार कार्कीलाई अपराध अनुसन्धान महाशाखा (सीआईबी) ले पक्राउ गरेको छ।
दरबारमार्गमा रहेको नेपाल ट्रस्ट कार्यालय र थामसेर्कु ट्रेकिङ प्रालिबीच भएको लिज सम्झौतामा ‘बदनीयत र अनियमितता’ देखिएको भन्दै सीआईबीले पछिल्ला महिनादेखि अनुसन्धान अघि बढाएको थियो।
सीआईबीका प्रवक्ता एसएसपी शिवकुमार श्रेष्ठका अनुसार अनुसन्धानका क्रममा पूर्वसचिव कार्कीको संलग्नता पुष्टि भएपछि उनलाई सोमवार पक्राउ गरिएको हो।
लिज सम्झौतामा अनियमितता आरोप
सीआईबीले कित्ता नम्बर ४६०६ को जग्गा लिजमा दिने प्रक्रियामा अतिरिक्त रूपमा कित्ता नम्बर ४६०५ पनि ‘अनधिकृत रूपमा थप गरिएको’ दाबी गरेको छ।
२०७४ जेठ १४ गते भएको करारअनुसार ३ वर्षको निर्माण अवधि राखी ३० वर्षका लागि लिज प्रदान गरिएको थियो।
अनुसन्धानकर्ताहरूका अनुसार उक्त सम्झौताले नेपाल ट्रस्टलाई दीर्घकालीन आर्थिक तथा सम्पत्ति हानी हुने अवस्था सिर्जना गरिएको छ।
गैरकानुनी लाभ र विश्वासघातको आरोप
सीआईबीले विभिन्न पदमा रहेका व्यक्तिहरूले ‘गैरकानुनी लाभ लिने, ठगी तथा आपराधिक विश्वासघात’ गरेको आशंकामा दफा छुट्याएर अनुसन्धान गरिरहेको जनाएको छ।
यसअघि कात्तिक २१ गते ट्रस्टका तत्कालीन सहसचिव लेखबहादुर कार्कीलाई पनि पक्राउ गरिएको थियो।
पछिल्लो अनुसन्धानमा दोलखा, जिरी–६ निवासी तथा पूर्वसचिव (हाल सेवा निवृत्त) अर्जुनकुमार कार्कीको सक्रिय संलग्नता खुलेपछि उनलाई पक्राउ गरिएको सीआईबीले पुष्टि गरेको छ।
सीआईबीका अनुसार प्रकरणसँग सम्बन्धित अन्य सम्भावित संलग्न व्यक्तिबारे पनि थप अनुसन्धान जारी छ।
प्रतिक्रिया!!
सम्बन्धित खबर
