नविन नरसिंह नेपाली / काठमाण्डौं,१७ पुस । पुसको कठ्याङ्ग्रिँदो जाडोमा विपन्न परिवारहरू न्याय र न्यानोको पर्खाइमा छटपटाइरहेका बेला बागमती प्रदेशका मुख्यमन्त्री इन्द्रबहादुर बानियाँ हेलिकप्टरमा चढेर सिरहामा ‘शाही बनभोज’ मनाउन पुगेको खबरले आम नागरिकको मनमा चिसो पसेको छ ।
यो घटनाले सत्तासीनहरूको संवेदनहीनता र सुविधाभोगी प्रवृत्तिको नाङ्गो प्रदर्शन गरेको छ ।
अहिले पुसको मध्य छ । तराईका जिल्लाहरूमा बाक्लो हुस्सु र शीतलहरले जनजीवन अस्तव्यस्त छ । दिनानुदिन चिसोका कारण वृद्धवृद्धा र बालबालिकाको ज्यान गइरहेको समाचारहरू आइरहेका छन् । गाउँघरमा दाउरा बालेर ज्यान जोगाउने प्रयास भइरहेको छ ।
गरीब तथा विपन्न परिवारका लागि एक छाक राम्रोसँग टार्न र एकसरो न्यानो कपडा जुटाउन पनि धौ-धौ छ । सरकारी अस्पतालहरूमा सामान्य सिटामोल नपाएर बिरामी छटपटाइरहेका छन् ।
यस्तो विषम परिस्थितिमा प्रदेशको नेतृत्व गरिरहेका मुख्यमन्त्री बानियाँ माउन्टेन एयरको हेलिकप्टर चढेर हेटौंडाबाट सिरहाको एक भव्य वनभोजमा सहभागी हुन पुगेका छन् । नेपाली कांग्रेस सिरहाका सभापति रामचन्द्र यादवले आयोजना गरेको यो ‘शाही वनभोज’ नयाँ वर्षको अवसरमा आयोजना गरिएको बुझिएको छ ।
‘व्यक्तिगत खर्च’ को हास्यास्पद दाबी
मुख्यमन्त्रीका स्वकीय सचिव मिलन पुडासैनीले मुख्यमन्त्री बानियाँ ‘आफ्नो व्यक्तिगत खर्चमा हेलिकप्टर चढेर सिरहा गएको’ दाबी गरेका छन् । तर, के एउटा प्रदेशको मुख्यमन्त्रीको ‘व्यक्तिगत खर्च’ यति धेरै हुन्छ कि उनी आम नागरिकले कल्पना पनि गर्न नसक्ने गरी हेलिकप्टरमा यात्रा गर्न सक्छन् ? यस्तो दाबीले सामान्य नागरिकको विवेकमाथि नै उपहास गरेको छ ।
आम जनतालाई एक छाक टार्न धौ-धौ परिरहेका बेला एउटा मुख्यमन्त्री हेलिकप्टर चढेर वनभोज खान जानु, र त्यसलाई ‘व्यक्तिगत खर्च’ भन्नुले जनताको भावनामाथि ठूलो चोट पुर्याएको छ ।
प्रश्नहरू जसको उत्तर छैन
के एक मुख्यमन्त्रीको व्यक्तिगत खर्चमा हेलिकप्टर चार्टर गर्न मिल्छ ? यदि मिल्छ भने त्यसको स्रोत के हो ?
प्रदेश सरकारको नेतृत्व गरिरहेको व्यक्तिले यस्तो संकटको बेला जनताको दुःखमा मलमपट्टी लगाउनुको सट्टा सुविधाभोगी जीवनशैली देखाउनु कत्तिको नैतिक हो ?
‘व्यक्तिगत खर्चमा हेलिकप्टर चढेर जाँदा पनि राज्यको सुरक्षा संयन्त्र र अन्य स्रोतसाधन प्रयोग भएको हुन्छ कि हुँदैन ?
यो घटनाले सत्तामा पुगेपछि नेताहरू कसरी जनसरोकारबाट टाढिँदै जान्छन् भन्ने ज्वलन्त उदाहरण पेस गरेको छ । पुसको जाडोमा कठ्याङ्ग्रिएका जनताले न्यानोको अपेक्षा गरिरहेका बेला मुख्यमन्त्रीको यो हेलिकप्टर यात्राले ‘नेता र जनताको नियति’ कति फरक छ भन्ने कुरालाई उजागर गरेको छ । यो घटनाले सुशासन र जनउत्तरदायित्वको नारा दिने नेताहरूको दोहोरो चरित्रलाई छर्लङ्ग पारेको छ ।
