देवानगञ्ज (सुनसरी) — सुनसरीको देवानगञ्ज गाउँपालिका–३, कप्तानगञ्जमा गत साउन १० गते भएको दुःखद घटनामा ज्यान गुमाएका ओमप्रकाश मेहता र जयप्रकाश मेहताका परिवार र नेपाल सरकार (गृह मन्त्रालय) बीच ७ बुँदे सहमति भएको छ।
साउन १४ गते भएको सहमति पत्रमा पीडित परिवारका तर्फबाट मृतक ओमप्रकाशका अभिभावक फणिदेव र मृतक जयप्रकाशका अभिभावक नरेश मेहता तथा सरकारका तर्फबाट माननीय गृहमन्त्री सुधन गुरुङले हस्ताक्षर गर्नुभएको छ।
सहमतिका मुख्य बुँदाहरू:
- सहिद घोषणा र राहत: मृतकद्वयलाई नेपाल सरकारबाट सहिद घोषणा गर्ने प्रक्रिया तत्काल अगाडि बढाउने र प्रत्येक मृतकका परिवारलाई सरकारका तर्फबाट रु. १० लाख राहत उपलब्ध गराउने।
- छानबिन र कारबाही: साउन १० गते राति देवानगञ्ज–३ मा भएको घटनाको निष्पक्ष र प्रभावकारी छानबिन गरी दोषीउपर प्रचलित कानुनबमोजिम कडा कारबाही प्रक्रिया तत्काल अगाडि बढाउने।
- मदरसाको कानुनी हैसियत अध्ययन: देवानगञ्ज गाउँपालिका–३ स्थित मदरसाको कानुनी हैसियत तथा सोसँग सम्बन्धित विषयहरूमाथि आवश्यक छानबिन तत्काल प्रारम्भ गर्ने।
- रोजगारीको व्यवस्था: प्रत्येक मृतकका परिवारका एक-एक जना योग्य सदस्यलाई रोजगारीको अवसर उपलब्ध गराउने।
- छानबिन समितिको प्रतिवेदन कार्यान्वयन: गठित छानबिन समितिले पेस गर्ने प्रतिवेदनका सुझाव तथा सिफारिसहरू यथाशीघ्र कार्यान्वयनमा ल्याउने।
- स्मृति पार्क निर्माण: मृतकद्वयको सम्झनामा स्थानीय सरकार (गाउँपालिका) सँगको समन्वयमा उपयुक्त स्थानमा ‘स्मृति पार्क’ निर्माण गर्ने।
- अन्तिम संस्कार: मृतकद्वयको शव साउन १५ गते दिउँसो २:०० बजे अन्तिम संस्कार (दाहसंस्कार) गर्ने।
गृह मन्त्रालयले जारी गरेको विज्ञप्तिमा शोकसन्तप्त परिवारजनप्रति गहिरो समवेदना व्यक्त गर्दै सरकार सत्य, न्याय, कानुनी शासन तथा नागरिकको विश्वासप्रति पूर्ण रूपमा प्रतिबद्ध रहेको जनाएको छ।
प्रतिक्रिया!!
सम्बन्धित खबर
