सगरमाथाको चुचुरोमा अनिता: सगरमाथा आरोहण गर्ने सशस्त्र प्रहरीकै पहिलो महिला कर्मचारीको कीर्तिमान
काठमाडौँ, ३ जेठ ।
सशस्त्र प्रहरी बल, नेपालकी सहायक हवलदार अनिता कार्कीले विश्वको सर्वोच्च शिखर सगरमाथाको सफल आरोहण गरी नयाँ इतिहास रचेकी छन्। शनिबार (३ जेठ/१७ मे) बिहान १० बजेर २० मिनेटमा उनले सगरमाथाको चुचुरोमा सफलतापूर्वक पाइला टेकेकी हुन्।
यो सफल आरोहणसँगै अनिता सशस्त्र प्रहरी बलको इतिहासमा सगरमाथा चढ्ने पहिलो महिला कर्मचारी बन्न सफल भएकी छन्। समग्र सशस्त्र प्रहरी कर्मचारीहरूमध्ये भने उनी सगरमाथाको शिखर पुग्ने तेस्रो व्यक्ति हुन्। सशस्त्र प्रहरीका सह-प्रवक्ता एवं डीएसपी शैलेन्द्र थापाले उनको यो ऐतिहासिक सफलताबारे आधिकारिक जानकारी दिएका हुन्।
पर्वतीय उद्धारकी ‘विज्ञ’ देखि राष्ट्रिय खेलाडीसम्म
रामेछाप जिल्लाको गोकुलगंगा गाउँपालिका–१, चुचुरेमा जन्मिएकी अनिता पर्वतीय उद्धार तथा उच्च हिमाली क्षेत्रमा विशेष दक्षता राख्छिन्। उनले सशस्त्र प्रहरीको पर्वतीय उद्धार तालिम शिक्षालयबाट ‘उन्नत पर्वतीय उद्धार तालिम’ (Advanced Mountain Rescue Training) समेत पूरा गरेकी छन्।
सगरमाथाको यो महाअभियान अघि उनले मनाङको चुलु फार इष्ट हिमाल र लोबुचे हिमालको समेत सफल आरोहण गरेर आफ्नो क्षमता प्रमाणित गरिसकेकी थिइन्। हिमाल आरोहण मात्र नभई उनी खेलकुद क्षेत्रमा पनि उत्तिकै सक्रिय छिन्; उनी फेन्सिङ खेलको राष्ट्रिय खेलाडी समेत हुन्।
निमा साङ्गे शेर्पाको बलियो साथ
अनिताको यस साहसिक र ऐतिहासिक सगरमाथा आरोहण अभियानमा अनुभवी शेर्पा ‘निमा साङ्गे शेर्पा’ ले मार्गदर्शक (गाइड) तथा सहयोगीको रूपमा मुख्य भूमिका निर्वाह गरेका थिए।
सशस्त्र प्रहरी बलले आफ्नो संगठनको प्रतिष्ठालाई हिमालको उचाइसम्म पुर्याएको भन्दै अनिताको यो सफलताले देश, संगठन र सम्पूर्ण नेपाली महिलाहरूको शिर उच्च बनाएको जनाएको छ।
प्रतिक्रिया!!
सम्बन्धित खबर
