काठमाडौं । नेकपा एमालेका अध्यक्ष केपी शर्मा ओली पक्राउ परेपछि भइरहेको प्रदर्शनले काठमाडौंको माइतीघर–बबरमहल क्षेत्र तनावग्रस्त बनेको छ। अध्यक्ष ओलीको पक्राउको विरोधमा सडकमा उत्रिएका एमाले कार्यकर्ता र प्रहरीबीच आइतबार अपराह्न झडप भएको हो।
गत भदौ २३ र २४ गते भएको ‘जेनजी’ आन्दोलनका क्रममा भएको दमन र त्यससँग जोडिएका घटनालाई लिएर तत्कालीन प्रधानमन्त्री ओली र तत्कालीन गृहमन्त्री रमेश लेखक पक्राउ परेपछि एमालेले देशव्यापी विरोध कार्यक्रम सुरु गरेको छ। माइतीघर क्षेत्रमा भेला भएका प्रदर्शनकारीले सरकारविरुद्ध चर्को नाराबाजी गर्दै निषेधित क्षेत्र तोड्न खोजेपछि स्थिति नियन्त्रणमा लिन प्रहरीले बल प्रयोग गरेको छ।
प्रदर्शनलाई नियन्त्रणमा लिन प्रहरीले लाठीचार्ज गर्नुका साथै केही सेल अश्रुग्यास समेत प्रहार गरेको छ। एमालेका जनवर्गीय संगठनहरूले हिजोदेखि नै काठमाडौंका विभिन्न स्थानमा प्रदर्शन जारी राखेका छन् भने देशभरका जिल्ला प्रशासन कार्यालयमार्फत सरकारलाई विरोध पत्र बुझाएका छन्।
भदौको आन्दोलनमा भएको दमनको विषयलाई लिएर सुरु भएको यो कानुनी प्रक्रिया र त्यसपछिको राजनीतिक ध्रुवीकरणले मुलुकको सुरक्षा व्यवस्थालाई थप संवेदनशील बनाएको छ। हाल माइतीघर र बबरमहल क्षेत्रमा ठूलो संख्यामा सुरक्षाकर्मी परिचालन गरिएको छ भने सवारी आवागमन समेत प्रभावित भएको छ।
प्रतिक्रिया!!
सम्बन्धित खबर
