२ चैत, काठमाडौं । उपभोक्ताले ग्यास नपाएर सास्ती भोगिरहेको समयमा उद्योगले नियतवश आपूर्ति रोकेर कृत्रिम अभाव सिर्जना गरेको विभागको ठहर छ। अनुगमनका क्रममा उद्योगले १४.२ केजी तौलका सिलिन्डरहरू डिपोमा थुपारेर राखेको तर बजारमा पठाउन आनाकानी गरेको पाइएको हो।
तत्काल जरिबाना र बिक्री वितरणको निर्देशन
अनुचित व्यापारिक क्रियाकलाप गरी उपभोक्तालाई मर्कामा पारेको कसुरमा विभागले उपभोक्ता संरक्षण ऐन २०७५ को दफा ३९ (१) (ख) बमोजिम श्रीराम ग्यास उद्योगलाई तत्काल ३ लाख रुपैयाँ जरिबाना गरेको छ। विभागले जरिबानामा मात्र सीमित नभई, मौज्दात रहेका सबै ६ हजार ३ सय ७७ वटा सिलिन्डरहरू नेपाल आयल निगमको समन्वयमा तत्काल उपभोक्तालाई बिक्री गर्न कडा निर्देशन समेत दिएको छ।
विभागका महानिर्देशक रोशन ज्ञवालीले बजारमा ग्यासको हाहाकार हुँदा पनि ठूलो परिमाणमा स्टक राख्नुले उद्योगको बदनियत प्रष्ट पार्ने बताएका छन्। उनले भने, “यस्तो संवेदनशील समयमा ग्यास होल्ड गर्नु गैरकानूनी हो। हामीले केवल सजाय मात्र गरेका छैनौँ, लुकाइएको ग्यास तत्काल बजारमा पुर्याउने सुनिश्चितता समेत गरेका छौँ।”
उद्योगको प्रतिरक्षा र प्राविधिक दाबी
यता श्रीराम ग्यास उद्योगले भने ग्यास लुकाएको नभई प्राविधिक कारणले मौज्दात देखिएको दाबी गरेको छ। उद्योगका व्यवस्थापन परामर्शदाता डिल्ली ढकालका अनुसार सरकारले फागुन २८ गतेदेखि आधा सिलिन्डर (७.१ केजी) मात्र बिक्री गर्ने निर्णय गर्नुअघि नै ती सिलिन्डरहरू उद्योगबाट भरिएर आएका थिए। निगमले पूरा भरिएका सिलिन्डर बेच्न रोक लगाएका कारण ती थन्किएको उनको तर्क छ।
यद्यपि, निगमको निर्णय भएको केही दिन बितिसक्दा पनि उद्योगले पूरा सिलिन्डर मौज्दात रहेको जानकारी ढिला गरी मात्र दिएको पाइएको छ। विभागले यसलाई बजारमा अभाव देखाएर कालोबजारी गर्ने छिद्रका रूपमा व्याख्या गरेको छ।
बिक्रेताको गुनासो र आगामी कदम
ग्यासका डिलरहरूले पनि उद्योगबाट ग्यास नआएका कारण आफूहरूले उपभोक्तालाई रित्तो हात फर्काउनुपरेको बताएका छन्। विभागले श्रीराम ग्यास मात्र नभई अन्य उद्योगहरूको पनि निगरानी बढाइएको र कृत्रिम अभाव सिर्जना गर्ने जो-कोहीलाई कडा कानुनी कारबाही गर्ने चेतावनी दिएको छ।
प्रतिक्रिया!!
सम्बन्धित खबर
