काठमाडौं । यसपटकको प्रतिनिधिसभा निर्वाचनले कला, मनोरञ्जन र ग्ल्यामर क्षेत्रका स्थापित अनुहारहरूलाई पनि नीति निर्माणको सर्वोच्च तहमा पुर्याएको छ । राष्ट्रिय स्वतन्त्र पार्टी (रास्वपा) ले सार्वजनिक गरेको समानुपातिक सांसदहरूको सूचीमा पूर्वमिस नेपाल अनुष्का श्रेष्ठ र अभिनेत्री तथा प्रस्तोता रीमा विश्वकर्मा अटाएका छन् । यसबाहेक काठमाडौं महानगरका पूर्वमेयर तथा र्यापर बालेन्द्र शाह (बालेन) प्रत्यक्षतर्फ भारी मतान्तरले विजयी भई प्रधानमन्त्रीको दौडमा देखिएका छन् ।
मिस नेपालबाट सांसद बन्ने पहिलो विजेता: अनुष्का श्रेष्ठ
सन् २०१९ की मिस नेपाल वर्ल्ड अनुष्का श्रेष्ठ नेपालको इतिहासमै मिस नेपालको उपाधि जितेर सांसद बन्ने पहिलो व्यक्ति बनेकी छन् । रास्वपाले उनलाई आदिवासी जनजाति महिला क्लस्टरबाट समानुपातिक सांसदका रूपमा सिफारिस गरेको हो ।
कीर्तिपुरमा आयोजित मिस नेपालको फाइनलमा ‘अधिकारभन्दा कर्तव्यलाई बढी ध्यान दियौँ भने संसार राम्रो हुन्छ’ भन्ने प्रश्नमा अनुष्काले दिएको तार्किक उत्तर (‘अधिकार र जिम्मेवारी एउटै सिक्काका दुई पाटा हुन्’) ले उनलाई उपाधि दिलाएको थियो । अस्ट्रेलियाबाट अध्ययन सकेर फर्केकी उनी विश्व सुन्दरी प्रतियोगितामा ‘ब्युटी विथ पर्पस’ र ‘मल्टिमिडिया’ अवार्ड जित्न सफल भएकी थिइन् ।
एक सफल महिला उद्यमीका रूपमा समेत स्थापित अनुष्काले सन् २०२० मा ‘माकुसी’ नामक डेजर्ट चकलेट ब्रान्ड स्थापना गरेकी थिइन्, जसले उनलाई दक्षिण एसियाका उत्कृष्ट १० महिला उद्यमीको सूचीमा पुर्याएको थियो । उनी काठमाडौं महानगरपालिकाको स्वयंसेवी सल्लाहकारका रूपमा पनि काम गरिसकेकी छन् ।
संसदमा आफ्नो भूमिकाबारे अनलाइनखबरसँग कुरा गर्दै अनुष्काले दुई मुख्य विषयमा केन्द्रित हुने बताइन्: १. स्वदेशी उत्पादन र नेपाली ब्रान्डलाई अन्तर्राष्ट्रिय बजारमा पुर्याउने । २. महिला अधिकार र सशक्तीकरणका क्षेत्रमा काम गर्ने ।
उनले भनिन्, ‘मिस नेपाल मेरो लागि एउटा माध्यम थियो । अब युवा महिला नीति–निर्माताको रूपमा काम गर्नेछु । नेता भनेको जनताको प्रतिबिम्ब हुनुपर्छ ।’
सञ्चारकर्म र अभिनयदेखि संसदसम्म: रीमा विश्वकर्मा
लामो समयदेखि सञ्चार र अभिनय क्षेत्रमा सक्रिय रीमा विश्वकर्मालाई रास्वपाले दलित महिला क्लस्टरबाट समानुपातिक सांसदका रूपमा सिफारिस गरेको छ । बर्दियाको गुलरियाकी रीमाले कक्षा ७ मै हुँदा टेलिश्रृंखला ‘जाँदाजाँदै’ बाट सञ्चार यात्रा सुरु गरेकी थिइन् ।
उनी अभिनेत्री, मोडल र चर्चित टेलिभिजन प्रस्तोता हुन् । उनले गायन रियालिटी शो ‘नेपाल आइडल’ समेत सञ्चालन गरेकी थिइन् । सन् २०११ मा फिल्म ‘स्वर’ बाट अभिनय यात्रा सुरु गरेकी उनले ‘भिसा गर्ल’, ‘ऋतु’, ‘बाटो मुनिको फूल २’, र ‘हिजोआजका कुरा’ जस्ता दर्जनौँ फिल्ममा काम गरिसकेकी छन् ।
राजनीतिक रूपमा सुरुमा कुलमान घिसिङ नेतृत्वको उज्यालो नेपाल पार्टीमा आबद्ध भए पनि पछि उनी रास्वपामै सक्रिय भइन् । सामाजिक र राजनीतिक मुद्दामा सामाजिक सञ्जालमार्फत प्रष्ट धारणा राख्ने हक्की स्वभावकी रीमाले अब कलाकारका रूपमा सोध्दै आएका प्रश्नहरूको उत्तर दिने जिम्मेवारी पाएकी छन् ।
बालेनको ‘अनडरग्राउन्ड’ देखि प्रधानमन्त्रीको दौडसम्मको यात्रा
नेपाली हिपहप (नेपहप) संगीतको अनडरग्राउन्ड दुनियाँबाट उदाएका बालेन्द्र शाह (बालेन) अहिले मुलुकको आगामी प्रधानमन्त्री बन्ने प्रबल सम्भावनासहित अगाडि बढेका छन् । प्रत्यक्षतर्फ झापा क्षेत्र नम्बर ५ मा उनले पूर्वप्रधानमन्त्री तथा नेकपा एमालेका अध्यक्ष केपी शर्मा ओलीलाई झन्डै ५० हजार मतको फराकिलो अन्तरले पराजित गर्दै ऐतिहासिक जित हासिल गरे ।
पेसाले इन्जिनियर बालेनले र्याप संगीतमार्फत युवाका आवाज, सामाजिक असमानता र भ्रष्टाचारविरुद्ध बोल्दै लोकप्रियता कमाएका थिए । सन् २०७९ को स्थानीय निर्वाचनमा स्वतन्त्र उम्मेदवारका रूपमा काठमाडौं महानगरपालिकाको मेयर जितेपछि उनले शहरी व्यवस्थापन र अनुशासनमा महत्त्वपूर्ण काम गरे ।
र्यापरबाट जनप्रतिनिधिसम्मको उनको यात्राले धेरै सेलिब्रेटीहरूलाई राजनीतिमा आउन प्रेरणा दिएको छ । मेयर हुँदा र चुनाव जितेपछि अन्तर्राष्ट्रिय सञ्चारमाध्यममा पाएको कभरेजले उनको विश्वव्यापी लोकप्रियतालाई दर्शाउँछ । संगीतमा अझै सक्रिय बालेनका केही नयाँ गीतहरू निकट भविष्यमा आउने तयारीमा छन् ।
को पराजित भए, को अटेनन् ?
कलाकारहरू राजनीतिमा होमिने क्रम बढे पनि सबैले सफलता पाउन सकेनन् ।
-
निशा अधिकारी: चर्चित अभिनेत्री निशा अधिकारीले काठमाडौं क्षेत्र नम्बर ५ बाट गतिशील लोकतान्त्रिक पार्टीको उम्मेदवारका रूपमा चुनाव लडिन्, तर निकै कम मत प्राप्त गरी पराजित भइन् ।
-
प्रकाश सपुत र रुपक विश्वकर्मा: रास्वपाको समानुपातिक सूचीमा रहेका गायक तथा अभिनेता प्रकाश सपुत र अभिनेता/चिकित्सक रुपक विश्वकर्मा घिमिरे सांसदका रूपमा छनोट हुन सकेनन् । सपुतले आफू सांसदमा नअट्ने पक्का भएपछि विदेशी कन्सर्टको घोषणा गरिसकेका छन् ।
-
कोमल वली: नेकपा एमालेले गायिका कोमल वलीलाई समानुपातिक उम्मेदवार बनाएको थियो, तर उनी पनि सांसदमा निर्वाचित भइनन् ।
-
अन्य कलाकार: रास्वपाले गायिका सत्यकला राई, टिभी होस्ट आसिफ शाह, र गायिका त्रिशला गुरुङलाई पनि समानुपातिक उम्मेदवार बनाएको थियो, तर उनीहरू अन्तिम सूचीमा पर्न सकेनन् ।
यस निर्वाचनले नेपाली राजनीतिमा कला र ग्ल्यामर क्षेत्रको बढ्दो प्रभाव र स्वीकार्यतालाई प्रष्ट पारेको छ । नवनिर्वाचित कलाकार सांसदहरूले सदनमा कस्तो भूमिका निर्वाह गर्छन्, त्यो भने हेर्न बाँकी छ ।
प्रतिक्रिया!!
सम्बन्धित खबर
