वीरगन्ज, १७ पुस । मधेसी समुदायको पहिचान र संस्कृतिको जगेर्ना गर्ने उद्देश्यका साथ जनमत पार्टी पर्साले आज वीरगन्जमा ‘राष्ट्रिय धोती दिवस’ भव्यताका साथ मनाएको छ। अंग्रेजी नयाँ वर्षको पहिलो दिन (जनवरी १) सँगै पर्ने १७ पुसलाई जनमत पार्टीले विगतका वर्षहरूदेखि नै धोती दिवसका रूपमा विशेष प्राथमिकताका साथ मनाउँदै आएको छ।
वीरगन्जको घण्टाघरबाट निकालिएको र्यालीमा सहभागी नेता तथा कार्यकर्ताहरूले धोती, कुर्ता र गम्छा लगाएर आफ्नो सांस्कृतिक पहिचानको प्रदर्शन गरेका थिए। कार्यक्रममा सहभागीहरूले “धोती हाम्रो शान हो, मधेसको पहिचान हो” जस्ता नाराहरू लगाउँदै नगरको विभिन्न भागको परिक्रमा गरेका थिए।
जनमत पार्टी पर्साका नेताहरूका अनुसार, यो दिवस केवल एउटा पोसाकको उत्सव मात्र नभई मधेसी पहिचानमाथि हुने विभेद र अपमानका विरुद्धको एउटा सांस्कृतिक आन्दोलन पनि हो। “हाम्रो पहिचानलाई गर्वका साथ विश्वसामु चिनाउन र नयाँ पुस्तालाई आफ्नो मौलिकता प्रति सचेत गराउन यो कार्यक्रम आयोजना गरिएको हो,” स्थानीय नेतृत्वले बताए।
कार्यक्रममा पार्टीका जिल्ला तहका नेता, कार्यकर्ता, विद्यार्थी, युवा तथा सर्वसाधारणको उल्लेख्य र उत्साहजनक सहभागिता रहेको थियो। र्याली समापनपछि आयोजित कोणसभामा बोल्ने वक्ताहरूले धोतीलाई राष्ट्रिय पोसाकको रूपमा सम्मान दिनुपर्ने माग समेत राखेका थिए।
प्रतिक्रिया!!
सम्बन्धित खबर
