तस्बिर डा.सिके राउत सचिवालयको सामाजिक सञ्जालबाट
२९ कात्तिक, जनकपुरधाम — मधेस प्रदेशमा जारी राजनीतिक अवरोधबीच उपसभामुख बबिता कुमारी राउत ईशरले शनिबार प्रदेशसभा भवनको प्राङ्गणमै बैठक सञ्चालन गरेकी छन्।
कर्मचारी अभाव, प्रक्रियागत अवरोध र सत्ता–प्रतिपक्षबीचको तानातानबीच प्राङ्गणमै खुला आकाशमुनि बसेर बैठक सञ्चालन गरिनु प्रदेश राजनीतिमा एक अभूतपूर्व घटना बनेको छ।
बैठक नेपाली कांग्रेस संसदीय दलका नेता कृष्ण प्रसाद यादवको प्रस्तावमा बोलाइएको थियो। सभामुख अनुपस्थित, सचिवालय निष्क्रिय र कर्मचारी नआएको अवस्थाबीच बैठक चलाउन उपसभामुखले विकल्पका रूपमा प्राङ्गण रोजेकी हुन्।
उपसभामुख ईशरले बैठकअघि भनिन्—
“कर्मचारी नभएको, आवश्यक सहयोग नपाएको र विभिन्न समस्या रहेका कारण बाध्यतावश बाहिरै बैठक सञ्चालन गर्नुपर्यो।”
जसपा संसदीय दलका नेता तथा पूर्वमुख्यमन्त्री सरोजकुमार यादवले प्रदेशसभा अवरुद्ध राख्न नहुने उल्लेख गर्दै ‘खुला ठाउँमै भए पनि बैठक चलाउन’ आग्रह गरेका थिए।
उनकै भनाइअनुसार अहिले बैठक भवनको मैदानमै आयोजना गरिएको हो।
यसअघि सात दलका प्रदेश सांसदहरू करिब एक घण्टासम्म प्रदेशसभा भवन अगाडिको प्राङ्गणमै बसेर विरोधजन्य उपस्थिति जनाएका थिए।
मधेस प्रदेशमा बाहिरै बसेर प्रदेशसभा सञ्चालन हुनु केवल ‘नाटकिय’ दृश्य मात्र होइन, यो तीन तहका गम्भीर समस्याको संकेत हो ।
सचिवालयका कर्मचारी बैठकमा उपस्थित नभएको घटना प्रदेशसभाको प्रशासनिक संरचना नै राजनीतिक दबाबमा चलिरहेको प्रमाण देखिन्छ। सभामुख–उपसभामुख विवाद र मन्त्रिपरिषद् गठनमा उत्पन्न तानातानले कर्मचारीलाई समेत दोधारमा पारेको विश्लेषण गरिन्छ।
मुख्यमन्त्री नियुक्ति विवाद, दलहरूको आ–आफ्नो दाबी, समर्थन–फिर्ताको राजनीति र गठबन्धन खेलले प्रदेशसभा सञ्चालन नै अवरुद्ध अवस्थामा पुर्याएको छ।
खुला ठाउँमा बैठक बस्नु राजनीतिक सहमतिको पूर्ण अभावको अभिव्यक्ति हो।
प्रदेशसभाजस्तो संवैधानिक संरचनाले विधिवत् प्रक्रिया पूरा गर्न नसक्नु केवल राजनीतिक अस्थिरता होइन, संवैधानिक अभ्यासमै कमजोरीको संकेत हो।
बैठक भवन छाडेर बाहिर बस्नु–बसाउनुले विधायिकाको गरिमा र प्रक्रियागत शुद्धताबारे गम्भीर प्रश्न उठाएको विश्लेषकहरूको भनाइ छ।
प्रतिक्रिया!!
सम्बन्धित खबर
