काठमाडौँ — नेपालमा पश्चिमी न्यून चापीय रेखा, स्थानीय वायु र पूर्वीय वायुको आंशिक प्रभावका कारण आज कोशी, बागमती र गण्डकी प्रदेशलगायतका उच्च पहाडी तथा हिमाली भेगमा वर्षाको सम्भावना रहेको मौसम पूर्वानुमान महाशाखाले जनाएको छ।
महाशाखाका अनुसार दिउँसो कोशी, बागमती, गण्डकी, कर्णाली र सुदूरपश्चिम प्रदेशका पहाडी तथा हिमाली भूभाग र कोशीको तराई क्षेत्रमा आंशिकदेखि साधारणतया बदली रही केही स्थानमा चट्याङसहित मध्यम वर्षा हुन सक्नेछ। मधेस र लुम्बिनीका पहाडी भेगमा पनि आंशिक बादल लाग्नेछ भने बाँकी तराईका भूभागमा मौसम सफा रहनेछ।
वर्षासँगै तराईका जिल्लाहरूमा गर्मीको प्रकोप कायमै रहने देखिएको छ। महाशाखाले लुम्बिनी र सुदूरपश्चिम प्रदेशका तराई क्षेत्रमा तातो लहर (लु) तथा बागमती र गण्डकीका तराई भूभागमा अत्यधिक गर्मी (तातो दिन) को सम्भावना औंल्याउँदै सतर्कता अपनाउन आग्रह गरेको छ।
आज राति पनि कोशी, बागमती र गण्डकीका पहाडी तथा हिमाली क्षेत्रका थोरै स्थानमा चट्याङसहित वर्षाको सम्भावना रहेको महाशाखाले जनाएको छ। कर्णाली र सुदूरपश्चिमका उच्च भेगमा भने एक–दुई स्थानमा मात्रै वर्षाको अनुमान गरिएको छ। तराईका अधिकांश भूभागमा भने रातिको समयमा मौसम सफा रहनेछ।
प्रतिक्रिया!!
सम्बन्धित खबर
