काठमाडौं । रणवीर सिंह स्टारर ‘धुरन्धर’ ले सर्वाधिक कमाउने हिन्दी फिल्मको रुपमा कीर्तिमान रचेको छ । यसअघि धेरै कमाउने हिन्दी फिल्मको रेकर्ड वास्तवमै हिन्दी फिल्मसँग थिएन ।
दक्षिण भारतका फिल्मलाई हिन्दीमा स्वरांकन गरिएका फिल्मले यो स्थान कब्जा गरिरहेका थिए । सन् २०१७ देखि ‘बाहुबली : द कन्क्लुजन’ को हिन्दी संस्करणले यो रेकर्ड राखेको थियो । त्यसपछि ‘पुष्पा २’ को हिन्दी संस्करणले रेकर्ड रच्यो ।
बीचमा पठान, गदर २, जवान र स्त्री २ ले उछाल कमाइ गरे । यी फिल्मले नेट कमाइमा रेकर्ड राखे तर, कर न्यून भएको कारणले यी फिल्मको वास्तविक कमाइ पनि न्यून रह्यो ।
बुधबार इतिहास बदलियो ।
‘धुरन्धर’ ले पाँचौ मंगलबार भारतीय बक्सअफिसमा ४.२५ करोड भारु कमाइ गर्यो । यो सँगै आदित्य धर निर्देशित फिल्म भारतीय बक्सअफिसमा सर्वकालिन धेरै कमाउने हिन्दी फिल्म बन्यो ।
प्रदर्शनको ३३ दिनमा फिल्मले भारतमा मात्र ७४१ करोड भारु नेट (८९३ करोड भारु) कमाएको छ । ‘पुष्पा २’ को ७३८ करोड नेट (८९२ करोड भारु ग्रस) लाई ‘धुरन्धर’ ले उछिनेको छ ।
‘धुरन्धर’ ले छैटौं सातामा ७५० करोड नेट कमाइ गर्नेछ । फिल्मको कमाइ ७७५ करोड नेटमा समेटिन सक्छ । यो फिल्मलाई ८०० करोड नेट कमाउन मुस्किल पर्न सक्ने देखिन्छ ।
‘धुरन्धर’ कोभिड महामारीपछि थिएटरमा सबैभन्दा धेरै कमाउने फिल्म समेत बनेको छ । यसका ३.२५ करोड वटा टिकट बिकेका छन् ।
