जनकपुरधाम, १८ पुस । आधुनिकताको लहरमा कतै आफ्नै मौलिक पहिचान हराउने त होइन? यही चिन्ता र आफ्नो गौरवशाली इतिहासलाई ब्युँझाउने संकल्पका साथ जनकपुरधाममा ‘मिथिला पहिरण दिवस’ मनाइएको छ। राष्ट्रिय पोसाक दिवसको सन्दर्भ पारेर हिन्दु सम्राट सेना नेपालले जनकपुरधामको सडकमा मिथिलाको परम्परागत शान झल्काएको हो।
१. रामायणकालीन इतिहासको स्मरण
रामायणकालीन सभ्यता र मिथिलाको राजधानी जनकपुरधामको आफ्नै मौलिक पहिचान छ। धोती, कुर्ता, गम्छा र शिरमा शानका साथ बाँधिने ‘पाग’ मिथिलाको आधारभूत पहिचान हो। तर, पछिल्लो समय युवा पुस्तामा पश्चिमा संस्कृतिको बढ्दो प्रभाव देखेपछि समाजलाई आफ्नो जरा सम्झाउन यो दिवस मनाइएको हिन्दु सम्राट सेनाका केन्द्रिय सदस्य ज्ञानेन्द्र सनातनीले बताए।
उनले भने, “हामीले हनुमान चालिसा र गायत्री मन्त्र मात्र होइन, आफ्नो पहिरन समेत बिर्सिन थाल्यौँ। सामाजिक सञ्जालमा टिकाटिप्पनी गर्नुअघि आफ्नो धर्म र संस्कृति के हो भनेर बुझ्न जरुरी छ।”
२. अन्तर्राष्ट्रियकरणको अभियान
हिन्दु सम्राट सेना नेपालका उपाध्यक्ष कृष्णा सनातनीले मैथिली पोसाकलाई केवल एउटा क्षेत्रको मात्र नभई अन्तर्राष्ट्रिय स्तरमै चिनाउनुपर्नेमा जोड दिए। वैदिक सनातन धर्ममा समेत धोती, कुर्ता र पागको महत्व रहेको स्मरण गराउँदै उनले जन्मदेखि मृत्युसम्मका हरेक संस्कारमा यो पोसाक अपरिहार्य रहेको बताए।
३. नयाँ वर्ष कि पश्चिमा सिको?
कार्यक्रममा लक्ष्मी सनातनीले भने अंग्रेजी नयाँ वर्षको नाममा भइरहेको विकृतिप्रति आक्रोश व्यक्त गरिन्। जनकपुरका सडकमा अश्लील गीत बजाएर नयाँ वर्ष मनाउने प्रवृत्तिले मिथिलाको मर्यादामा आँच पुर्याएको उनको ठहर छ। उनले भनिन्:
हाम्रो नयाँ वर्ष: सनातन धर्म अनुसार नयाँ वर्ष बैशाख १ गते नै हो।
पहिचानको अपमान: अरू देशले हाम्रो संस्कृतिमा रुचि देखाइरहँदा हामी आफैँले यसलाई बेवास्ता गर्नु लाजमर्दो कुरा हो।
मुख्य सन्देश: > आफ्नो पहिचान र पहिरनको सम्मान गरौँ। आधुनिक बन्ने नाममा आफ्नो पुर्ख्यौली गौरवलाई नमार्न र आफ्ना बालबालिकालाई संस्कार सिकाउन यो दिवसले सबैलाई अपिल गरेको छ।
