राजविराज, ११ पुस — सामाजिक सञ्जालमा हिन्दु देवी–देवताबारे आपत्तिजनक टिप्पणी गरेको आरोप लागेका सप्तरीका अफरोज आलमले सार्वजनिक रूपमा माफी मागेपछि उत्पन्न विवाद समाधान भएको छ।
जिल्ला प्रशासन कार्यालय सप्तरीमा भएको छलफलपछि हिन्दु सम्राट सेना सप्तरी र बजरङ्ग दलले आह्वान गरेका सबै आन्दोलन तथा बन्दका कार्यक्रम फिर्ता लिएका छन्।
प्रमुख जिल्ला अधिकारी टुवराज पोखरेलको पहलमा आयोजित छलफलमा हिन्दु सम्राट सेना सप्तरी, बजरङ्ग दल, तीनवटै सुरक्षा निकायका प्रमुखहरू तथा हिन्दु–मुस्लिम समुदायका अगुवाहरूको सहभागिता रहेको थियो। छलफलपछि आपसी सहमतिमा विवाद टुंगिएको जिल्ला प्रशासनले जनाएको छ।
आन्दोलनरत पक्षको मागअनुसार अफरोज आलमले जिल्ला प्रशासन कार्यालय परिसरमै सबैको सामु कान समातेर आफूबाट गल्ती भएको स्वीकार गर्दै आगामी दिनमा यस्ता गतिविधि नगर्ने प्रतिबद्धता जनाए। उनले मौखिक तथा लिखित रूपमा माफी मागेपछि अवस्था सामान्य बनेको हो।
विवाद समाधान भएसँगै जिल्लामा शान्ति र सद्भाव कायम भएको स्थानीय प्रशासनले जनाएको छ।
प्रतिक्रिया!!
सम्बन्धित खबर
