काठमाडौं —सप्तरीको अग्नीसाइर कृष्णासवरन गाउँपालिकामा राजनीतिक विवाद उत्कर्षमा पुगेको छ। गाउँपालिका अध्यक्ष दिनानाथ चौधरी र उपाध्यक्ष कल्पना चौधरीबीच राजीनामा प्रकरणले पालिकाको प्रशासनिक र राजनीतिक वातावरण नै तनावग्रस्त बनेको छ।
उपाध्यक्ष कल्पना चौधरीले अध्यक्ष दिनानाथ चौधरीले राजीनामा दिएको र आफूले सो राजीनामा स्वीकृत गरेको दाबी गरेकी छिन्। तर, अध्यक्ष चौधरीले भने ती सबै दाबीलाई “पूर्णरूपमा जालसाजी र षड्यन्त्रपूर्ण” भन्दै खण्डन गरेका छन्।
अध्यक्ष चौधरीको पक्ष : “राजीनामा कीर्ते र मनगढन्ते”
अध्यक्ष दिनानाथ चौधरीका अनुसार, उनले कुनै पनि निकायमा राजीनामा पेश गरेका छैनन्।
उनले आरोप लगाउँदै भनेका छन्,
“मेरो नाममा तयार पारिएको राजीनामा पत्र पूर्णरूपमा कीर्ते हो। मैले स्वेच्छाले राजीनामा दिएको भए कार्यपालिका बैठकहरू निरन्तर किन आह्वान हुँदै आए? र कागजी कारोबारमा मेरो सनाखत बिना कसरी दस्तावेज चलायो?”
चौधरीले २०८२ असोज २५ गते जारी गरेको विज्ञप्तिमा पनि राजनीतिक असहयोग र विपक्षी षड्यन्त्रबीच आफू कहिल्यै राजीनामा नदिने घोषणा गरिसकेको स्मरण गराएका छन्।
उनका अनुसार, पालिकाको मूल्याङ्कनमा अग्नीसाइर कृष्णासवरनलाई सप्तरीकै उत्कृष्ट पालिकामध्ये एक मानिएको तथ्यले आफ्नो नेतृत्व सफल भएको प्रमाणित गर्छ।
उनले पालिकाको चलानी नम्बर ५६३ मार्फत तोकिएका कर्मचारीको नाम समेत हेरफेर गरिएको आरोप लगाउँदै, यो विषय न्यायिक निकायमा लैजाने तयारी गरिरहेका छन्।
जनतालाई भ्रममा नपर्न आग्रह गर्दै उनले भने,
“म जनताको मतले निर्वाचित अध्यक्ष हुँ। कुनै अफवाहले मेरो जिम्मेवारी अन्त्य गर्न सक्दैन।”
उपाध्यक्षको दाबी : “अध्यक्षले राजीनामा दिइसकेका छन्”
उता, उपाध्यक्ष कल्पना चौधरी भने आफ्नो अडानमा दृढ छिन्।
उनले संक्षेपमा प्रतिक्रिया दिँदै भनिन्,
“अध्यक्षले राजीनामा दिइसक्नुभएको हो। उहाँले दिएको छैन भनेर भन्नाले तथ्य बदलिँदैन।”
तर, उपाध्यक्ष चौधरीले राजीनामाको लिखित प्रमाण सार्वजनिक गर्न अझैसम्म अग्रसरता देखाएकी छैनन्। यसले पालिकाभित्र अझ ठूलो भ्रम र विभाजन सिर्जना गरेको छ।
गाउँपालिकाको नेतृत्व दुवै जना चौधरी उपनामका भए पनि, उनीहरू भिन्न राजनीतिक पृष्ठभूमि र दलसम्बद्धताका हुन्।
अध्यक्ष चौधरी सत्तारूढ दल निकट मानिन्छन् भने उपाध्यक्ष चौधरी विपक्षी दलबाट निर्वाचित भएकी हुन्।
त्यसैले, यो विवाद केवल प्रशासनिक नभई राजनीतिक शक्ति संघर्षको रूप लिएको देखिन्छ।
स्थानीय स्रोतका अनुसार, पछिल्ला महिनाहरूमा पालिकाभित्र नीति–निर्णयमा मतभेद बढ्दै गएको थियो। बजेट विनियोजनदेखि कर्मचारी सरुवा सम्मका विषयमा दुई पक्षबीच तिक्तता बढेको बताइन्छ।
राजीनामा वास्तविक हो कि कीर्ते — यो प्रश्नले अहिले सम्पूर्ण पालिकालाई अनिश्चिततामा पारेको छ।
यदि अध्यक्ष चौधरीको दाबी अनुसार राजीनामा जालसाजीपूर्वक तयार पारिएको हो भने, यो स्थानीय तहमा लोकतान्त्रिक प्रक्रियामाथिको गम्भीर प्रश्न बन्न सक्छ।
तर यदि उपाध्यक्षको दाबी पुष्टि भयो भने, अध्यक्षले राजनीतिक दबाबपछि पछुतोका कारण आफ्नो निर्णय अस्वीकार गर्ने प्रयास गरेको त होइन भन्ने प्रश्न पनि उठ्नेछ।
न्यायिक निकायमा मुद्दा पुग्ने संकेत दिँदै अध्यक्ष चौधरीले कानुनी बाटो रोज्ने तयारी गरेकाले अब यो विवाद कानूनी र राजनीतिक दुवै तहमा निर्णायक मोडतर्फ उन्मुख भएको छ।
प्रतिक्रिया!!
सम्बन्धित खबर
