काठमाडौँ — अविरल वर्षाका कारण आएको बाढी र पहिरोले काठमाडौँ उपत्यकालाई देशका अन्य भागसँग जोड्ने सम्पूर्ण मुख्य राजमार्गहरू पूर्ण रूपमा अवरुद्ध भएका छन्। पृथ्वी राजमार्ग, बीपी राजमार्ग, कान्ति लोकपथलगायतका मुख्य सडकहरूमा पहिरो खसेपछि उपत्यका भित्रिने र बाहिरिने यातायात सेवा ठप्प भएको छ, जसले गर्दा उपत्यका एक किसिमको ‘नाकाबन्दी’को अवस्थामा पुगेको छ।
प्रशासनले सुरक्षा सतर्कता अपनाउँदै लामो तथा मध्यम दूरीका सवारीसाधन सञ्चालनमा रोक लगाएपछि सयौँ मालवाहक ट्रक र यात्रुवाहक बसहरू बाटोमै अलपत्र परेका छन्। सडक सञ्जाल अवरुद्ध हुँदा दैनिक उपभोग्य वस्तु तथा इन्धनको आपूर्ति शृङ्खलामा गम्भीर असर परेको छ भने बजारमा महँगी र अभाव बढ्ने चिन्ता छरिएको छ।
मुख्य राजमार्गहरूको अवस्था
प्रहरी तथा सडक विभागका अनुसार पृथ्वी राजमार्ग अन्तर्गत धादिङ खण्डका कृष्णभिर, तिग्राडखानी, ज्यामिरेघाट, ज्वाङखोला र गजुरीको परेवा भिरमा गएको पहिरोले यातायात पूर्ण रूपमा बन्द गराएको छ। त्यस्तै, चितवनको धारापानी क्षेत्रमा सडक भासिएको छ भने नारायणगढ–मुग्लिन र मुग्लिन–पोखरा खण्डमा पनि पहिरोका कारण सवारी आवागमन ठप्प छ।
पूर्वी नेपाललाई जोड्ने जीवनरेखा मानिएको बीपी राजमार्गको काभ्रेस्थित रोशी गाउँपालिका क्षेत्रमा (चारसयबेँसी र गिम्दीबेँसी) पहिरो खस्दा सवारीसाधन चल्न सकेका छैनन्। काठमाडौँलाई हेटौँडासँग जोड्ने कान्ति लोकपथमा पनि गोदावरीको बिर्खेंधारासहित विभिन्न स्थानमा खसेको पहिराले सडक पूर्ण रूपमा अवरुद्ध बनाएको छ। यसबाहेक बुटवल–पाल्पाको सिद्धबाबा क्षेत्र, कालीगण्डकी करिडोर, पासाङल्हामु राजमार्ग र सिद्धिचरण लोकमार्गमा पनि बाढीपहिरोले यातायात ठप्प पारेको छ।
वैकल्पिक मार्गमा कडाइ र सवारी चाप
मुख्य नाकाहरू बन्द भएपछि सीमित विकल्पका रूपमा रहेको त्रिभुवन राजपथमा सवारीसाधनको अत्यधिक चाप बढेको छ। अत्यधिक जाम र सुरक्षा जोखिमलाई मध्यनजर गर्दै जिल्ला प्रशासन कार्यालय मकवानपुरले त्रिभुवन राजपथमा निश्चित समयतालिका तोकेर आलोपालो प्रणालीमा मात्र सवारी चलाउने व्यवस्था मिलाएको छ।
सडकको नाजुक अवस्थालाई दृष्टिगत गर्दै प्रशासनले ठूला मालवाहक सवारीसाधनको सञ्चालनमा कडा प्रतिबन्ध लगाएको छ। इन्धन र एलपी ग्यास बाहेक १० चक्केभन्दा लामा र १५ टनभन्दा बढी भार बोकेका मालवाहक ट्रकहरूलाई रोक लगाइएको छ भने यात्रुवाहक बसहरूको हकमा पनि ११ मिटरभन्दा लामो लम्बाइ नभएका सवारीलाई मात्र अनुमति दिइएको छ।
उद्धार तथा मर्मत प्रयास
सडक विभागले देशभरका जोखिमपूर्ण खण्डहरूमा २४० भन्दा बढी हेभी मेसिन र प्राविधिक टोलीहरू ‘स्ट्यान्डबाई’ राखिएको दाबी गरेको छ। पहिरो गएको स्थानमा छिटोभन्दा छिटो सफाइ गरी यातायात खुलाउने नीति लिइए पनि निरन्तर भइरहेको वर्षाका कारण मर्मत कार्यमा बाधा पुगेको सम्बन्धित निकायले जनाएको छ। प्रशासनले मौसम सुधार नभएसम्म अत्यावश्यक बाहेकका यात्रा नगर्न र उच्च सतर्कता अपनाउन सर्वसाधारणमा विशेष अनुरोध गरेको छ।
प्रतिक्रिया!!
सम्बन्धित खबर
